Sexual Orientation: స్వలింగ ఆకర్షణ సహజమేనా? దశాబ్దాల పరిశోధనలు ఏం చెబుతున్నాయి?

ప్రేమ మనిషిని వెతుక్కుంటూ వస్తుందో… మనిషే ప్రేమను వెతుక్కుంటూ వెళ్తాడో ఎవరికీ తెలియదు కానీ.. ఒక రోజు మాత్రం ప్రతి మనిషి జీవితంలో తప్పకుండా వస్తుంది. తన గుండె తనకే కొత్తగా వినిపించే రోజు అది. అందరూ ఒకే దారిలో నడుస్తున్నట్టు కనిపించినా, తన మనసు మాత్రం వేరే దిశగా అడుగులు వేస్తోందని తొలిసారి గుర్తించే రోజు అది. ఆ క్షణం చాలా చిన్నదే కానీ ఆ తర్వాత మొదలయ్యే ప్రయాణం చాలా పెద్దది. పురుషుడిగా పుట్టిన ఒకరికి మరో పురుషుడి పట్ల ఆకర్షణ కలిగినా… మహిళగా పుట్టిన ఒకరికి మరో మహిళ పట్ల ప్రేమ చిగురించినా… ఆ భావాన్ని అర్థం చేసుకోవడానికి కొందరికి రోజులు పడతాయి. మరికొందరికి సంవత్సరాలు పట్టవచ్చు. ఇంకొందరు జీవితంలో చాలా దూరం నడిచాక తమ మనసు రాసుకున్న కథను చదువుతారు.

ఆ ప్రశ్నలకు సమాధానాలు పుస్తకాల చివరి పేజీల్లో ఉండవు. గూగుల్ సెర్చ్‌లో మొదటి లింకులో కూడా దొరకవు. మనసు తన నిజాన్ని దాచదు. మనమే దాన్ని ఆలస్యంగా గుర్తిస్తాం. ప్రపంచాన్ని అర్థం చేసుకోవడం చిన్నప్పుడే మొదలవుతుంది. మనసును అర్థం చేసుకోవడం మాత్రం చాలా ఆలస్యంగా మొదలవుతుంది. ఎవరో చెప్పిన మాట. ఎక్కడో చదివిన అబద్ధం. ఆధారం లేని సలహా. ఒక్కోటి మనసుమీద దుమ్ములా పేరుకుపోతాయి. ఆ దుమ్మును దులిపేయడానికి శాస్త్రం దశాబ్దాలుగా పని చేస్తూనే ఉంది.

1973లో ఏం జరిగింది?

ఈ ప్రయాణంలో ఒక పేరు తరచూ వినిపిస్తుంది. డాక్టర్ ఎవెలిన్ హూకర్. 1957లో ఆమె చేసిన పరిశోధన అప్పటి ప్రపంచాన్ని ఆశ్చర్యపరిచింది. గే పురుషులు, హెటెరోసెక్సువల్ పురుషుల మానసిక ఆరోగ్యాన్ని పోల్చి పరిశీలించిన ఆమెకు ఒక విషయం స్పష్టమైంది. స్వలింగ ఆకర్షణ ఉన్న వ్యక్తుల్లో మానసిక రుగ్మతలు ఎక్కువగా ఉన్నాయని చెప్పడానికి ఎలాంటి ఆధారాలు కనిపించలేదు. ఆ ఒక్క పరిశోధనతో ప్రపంచం మారిపోలేదు. కానీ వైద్యశాస్త్రం ఒక కొత్త దిశలో ఆలోచించడం మాత్రం అక్కడి నుంచే మొదలైంది.

తర్వాతి 16 సంవత్సరాలు ప్రపంచవ్యాప్తంగా పరిశోధనలు కొనసాగాయి. కొత్త ఆధారాలు వెలుగులోకి వచ్చాయి. మానసిక వైద్యులు, శాస్త్రవేత్తలు, పరిశోధకులు ఒకే ప్రశ్నకు సమాధానం వెతికారు. చివరకు 1973లో అమెరికన్ సైకియాట్రిక్ అసోసియేషన్ స్వలింగ ఆకర్షణను మానసిక రుగ్మతల జాబితా నుంచి తొలగించింది. ఆ నిర్ణయం వైద్య చరిత్రలో ఒక మలుపుగా నిలిచింది. ప్రయాణం అక్కడితో ఆగలేదు. మరో 17 సంవత్సరాల తర్వాత, 1990 మే 17న ప్రపంచ ఆరోగ్య సంస్థ కూడా అదే నిర్ణయాన్ని ప్రకటించింది. ఆ రోజు నుంచి ప్రపంచ ఆరోగ్య రంగంలో ఒక కొత్త అధ్యాయం మొదలైంది.

ఈరోజు ప్రపంచ ఆరోగ్య సంస్థ, అమెరికన్ సైకాలజికల్ అసోసియేషన్, అమెరికన్ అకాడమీ ఆఫ్ పీడియాట్రిక్స్, ఇండియన్ సైకియాట్రిక్ సొసైటీ లాంటి ప్రముఖ సంస్థలన్నీ ఒకే విషయాన్ని చెబుతున్నాయి. పురుషుడికి పురుషుడి పట్ల, మహిళకు మహిళ పట్ల ఆకర్షణ కలగడం మానవ సహజ వైవిధ్యంలో భాగం. ఈ అవగాహన ఒక్క అభిప్రాయం మీద నిలబడలేదు. దశాబ్దాలుగా సాగిన పరిశోధనలు, వేలాది అధ్యయనాలు, లక్షలాది మంది జీవితాల నుంచి సేకరించిన ఆధారాల మీద నిలిచింది.

స్వలింగ ఆకర్షణ ఎలా కలుగుతుంది?

అయినా ఒక ప్రశ్న మాత్రం అక్కడే నిలిచిపోయింది. ఒక పురుషుడి మనసు ఇంకో పురుషుడివైపు లేదా ఒక అమ్మాయి మనసు ఇంకో అమ్మాయి వైపు ఎందుకు తిరుగుతుంది? ఈ ప్రశ్నలకు సమాధానం దొరికుంటే శాస్త్రవేత్తల పని ఎప్పుడో పూర్తయ్యేది కానీ మనిషి మనసు అంత సులభంగా చదివే పుస్తకం కాదు. ప్రతి పరిశోధన ఒక చిన్న తలుపు మాత్రమే తెరిచింది. ఆ తలుపు వెనుక మరో ప్రశ్న కనిపించింది. జన్యువుల వైపు చూశారు. మెదడు ఎదుగుదల వైపు చూశారు. తల్లి గర్భంలో శిశువు రూపుదిద్దుకునే రోజుల్ని పరిశీలించారు. శరీరంలో జరిగే జీవసంబంధ మార్పులను గమనించారు. ఒక్కో పరిశోధన ఒక్కో సమాధానాన్ని చూపించింది. ఆ సమాధానాలను కలిపి చూస్తే ఒక చిత్రం కనిపించింది. లైంగిక ధోరణి మనిషి సహజ జీవితంలో భాగమనే అర్థమైంది.

ఆ చిత్రం స్పష్టమవుతున్న కొద్దీ పాత నమ్మకాలు మసకబారడం మొదలైంది. అయినా కొన్ని కథలు మాత్రం తరతరాలుగా అలాగే తిరుగుతూనే ఉన్నాయి. సినిమా చూసి ఇలా అయిపోయాడని ఒకరు చెప్పారు. ఇంటర్నెట్ వల్ల మారిపోయిందని ఇంకొకరు అన్నారు. స్నేహితుల ప్రభావమని మరొకరు నమ్మారు. ఈ కథలు చాలా ఇళ్లలో వినిపించాయి. చాలా మనసులను భయపెట్టాయి. కానీ వాటి వెనుక నిలబడే ఆధారాలు శాస్త్రానికి ఎప్పుడూ కనిపించలేదు.

ప్రేమ గురించి మనుషులు ఎన్నో కథలు చెప్పారు. ఆకర్షణ గురించి కూడా ఎన్నో అభిప్రాయాలు పుట్టాయి. శాస్త్రం మాత్రం కథలు చెప్పలేదు. ఆధారాలు అడిగింది. ఆధారాలు దొరికిన చోటే తన నిర్ణయాలను రాసుకుంది. బహుశా అందుకేనేమో… ఒక మనిషి తన గురించి తాను తెలుసుకునే ప్రయాణాన్ని శాస్త్రం ఆపలేదు. వేగం పెంచలేదు. ఒక్క పని మాత్రం చేసింది. ఆ దారిలో పేరుకుపోయిన అపోహలను ఒక్కొక్కటిగా తొలగించింది. ఎందుకంటే నిజాన్ని తెలుసుకోవడం కంటే, నిజాన్ని అంగీకరించడం చాలా పెద్ద ప్రయాణం.

ALSO READ: నవ్వుల వెనుక దాగి ఉన్న కన్నీళ్లు.. ట్రాన్స్‌విమెన్‌ అభినేత్రి జీవితం చెబుతున్న పాఠం