Lakshmi Aruna 
దేశంలో వీధి కుక్కల సమస్యపై మరోసారి న్యాయవ్యవస్థ దృష్టి కేంద్రీకరించింది. రోజూ మన కళ్ల ముందే కనిపించే ఈ సమస్య ఎంత ప్రమాదకరంగా మారుతుందో తాజాగా సుప్రీంకోర్టు చేసిన వ్యాఖ్యలు స్పష్టంగా చూపిస్తున్నాయి. ప్రజల భద్రత విషయంలో ఎలాంటి నిర్లక్ష్యానికి తావులేదని అత్యున్నత న్యాయస్థానం గట్టిగా హెచ్చరించింది.
వీధుల్లో సంచరించే కుక్కల ప్రవర్తన పూర్తిగా అనిశ్చితమైందని సుప్రీంకోర్టు అభిప్రాయపడింది. అవి ఎప్పుడు ఎలా స్పందిస్తాయో ముందుగా అంచనా వేయడం అసాధ్యమని తెలిపింది. కేవలం ఈ ప్రమాదాలు కుక్క కాటు ఘటనలకే పరిమితం కాకుండా, వాటి కారణంగా రోడ్లపై అనేక ప్రమాదాలు కూడా చోటుచేసుకుంటున్నాయన్న వాస్తవాన్ని ధర్మాసనం గుర్తుచేసింది. ఈ అంశంపై జస్టిస్ విక్రమ్ నాథ్, జస్టిస్ సందీప్ మెహతా, జస్టిస్ ఎన్వీ అంజారియాలతో కూడిన ధర్మాసనం కీలక వ్యాఖ్యలు చేసింది.
ఢిల్లీలో వీధి కుక్కలను షెల్టర్ హోమ్లకు తరలించాలంటూ గతంలో ఇచ్చిన ఆదేశాలపై దాఖలైన పిటిషన్ను విచారించిన సందర్భంగా ఈ చర్చ ముందుకొచ్చింది. ప్రజల ప్రాణాలకు ముప్పుగా మారుతున్న పరిస్థితిని దృష్టిలో పెట్టుకుని, ఈ సమస్య తీవ్రతపై కోర్టు పలు సందేహాలు వ్యక్తం చేసింది. ప్రమాదాలు జరిగాక చికిత్సల గురించి ఆలోచించడంకన్నా, ముందే నివారణ చర్యలు తీసుకోవాల్సిన అవసరం ఉందని ధర్మాసనం అభిప్రాయపడింది.
ఈ విచారణలో పిటిషనర్ తరఫున సీనియర్ న్యాయవాది కపిల్ సిబల్ వాదనలు వినిపించారు. వీధుల్లో తిరిగే కుక్కల తీరుపై ఏదైనా అనుమానం కలిగితే స్థానికులు అధికారులకు సమాచారం ఇవ్వాలని ఆయన సూచించారు. అలా సమాచారం అందితే అధికారులు ఆ శునకాన్ని తీసుకెళ్లి స్టెరిలైజేషన్ ప్రక్రియ పూర్తి చేసి తిరిగి వదిలిపెడతారని కోర్టుకు వివరించారు.
అయితే ఈ వాదనలపై ధర్మాసనం తీవ్రంగా స్పందించింది. స్టెరిలైజేషన్ చేసినంత మాత్రాన కుక్కల ప్రవర్తన మారిపోతుందన్న హామీ ఏదీ లేదని సూచించింది. వాటికి మనుషులను కరవద్దని చెప్పేలా కౌన్సిలింగ్ కూడా అవసరమన్న వ్యంగ్య వ్యాఖ్యలు చేసింది. ఈ మాటల ద్వారా వీధి కుక్కల స్వభావంలో ఉన్న అనూహ్యతను కోర్టు మరింత స్పష్టంగా హైలైట్ చేసింది.
వీధి కుక్కలు రోడ్లపై అకస్మాత్తుగా పరుగులు తీయడం వల్ల వాహనదారులు అదుపు తప్పి ప్రమాదాల్లో చిక్కుకునే పరిస్థితులు ఏర్పడుతున్నాయని ధర్మాసనం గుర్తుచేసింది. ఒక చిన్న నిర్లక్ష్యం కూడా ప్రాణనష్టానికి దారితీసే ప్రమాదం ఉందని హెచ్చరించింది. అందుకే ప్రజల భద్రతే ప్రధాన లక్ష్యంగా పాలన వ్యవస్థలు మరింత జాగ్రత్తగా వ్యవహరించాల్సిన అవసరం ఉందని సుప్రీంకోర్టు స్పష్టంగా సంకేతాలు ఇచ్చింది.
ALSO READ: క్లారిటీ లేకపోవడం కాదు.. అవకాశాల ఎక్కువగా ఉన్నాయ్.. Gen-Zల్లో పెరిగిపోతున్న కన్ఫూజన్కి కారణాలివే!
Dogs Vs Humans: మనిషితత్వం, కుక్కతత్వం మధ్య యుద్ధం..! ఈ సమస్యకు అసలు మూలం ఓ దిక్కుమాలినతత్వం!