Hayli Gubbi Volcano: ఇథియెపియా అగ్నిపర్వత విస్ఫోటనం గురించి సంచలన నిజాలు.. శాటిలైట్‌ చిత్రాలు చెబుతున్నది ఏంటంటే?

ఇథియోపియా(ethiopia)లోని హైలీ గుబ్బి(Hayli Gubbi) అగ్నిపర్వతం దాదాపు 12వేల సంవత్సరాల తరువాత నవంబర్ 23, 2025న భారీగా విస్ఫోటనం చెందింది. ఈ అగ్నిపర్వతం రాజధాని అడ్డిస్ అబాబా నుంచి సుమారు 800 కిలోమీటర్ల దూరంలో ఉంది. ఈసారి జరిగిన విస్ఫోటనం చాలా శక్తివంతంగా ఉండి సుమారు 45వేల అడుగుల ఎత్తుకు భస్మ మేఘాన్ని పంపింది. ఈ ఎత్తు సాధారణంగా విమానాలు ప్రయాణించే స్థాయికి సమీపంలో ఉండటంతో వైమానిక ప్రయాణాలకు ప్రమాదం ఏర్పడింది.

ఈ విస్ఫోటనంలో వెలువడిన సల్ఫర్ డైఆక్సైడ్ మేఘాన్ని కోపెర్నికస్ సెంటినెల్ 5పి వంటి ఉపగ్రహాలు స్పష్టంగా గుర్తించాయి. ఈ వాయువు మేఘం ఇథియోపియాను దాటి అరేబియా ద్వీపకల్పం మీదుగా పశ్చిమ భారతం వరకు ప్రయాణించింది. ఈ మేఘం మొత్తం దూరం 3,700 కిలోమీటర్లకు పైగా ఉంది. ఇందులో సల్ఫర్ వాయువు మాత్రమే కాకుండా గాజు తునకలు కూడా ఉన్నాయి. ఇవి గాలి నాణ్యతను తగ్గించే అవకాశం ఉంది.

ఈ అగ్నిపర్వతం రెండు దిశల్లో భస్మాన్ని పంపింది. ఒక మేఘం ఈశాన్యం వైపు మరో మేఘం వాయువ్యం వైపు కదిలింది. దీంతో వాతావరణ నిపుణులు మేఘాల దిశలను స్పష్టంగా కనిపెట్టగలిగారు. సల్ఫర్ డైఆక్సైడ్ సూర్యకాంతి, వాతావరణంలో ఉన్న నీటి ఆవిరితో కలిసినప్పుడు సల్ఫేట్ అనే కణాలు ఏర్పడతాయి. ఇవి తాత్కాలికంగా ఉష్ణోగ్రతలను తగ్గించే ప్రభావం చూపవచ్చు.

ఈ విస్ఫోటనం ప్రభావం ఇథియోపియా వరకు మాత్రమే పరిమితం కాలేదు. వాయువులతో కూడిన ఈ భారీ మేఘం వేల కిలోమీటర్ల దూరంలో ఉన్న దక్షిణ ఏశియా ప్రాంతాల వాతావరణం, గాలి నాణ్యతపై కూడా ప్రభావం చూపింది. ఇండియాలో కొన్ని విమానాల రద్దు, ఆలస్యాలు ఈ కారణంగా నమోదయ్యాయి. ఉపగ్రహాల ద్వారా ఇలాంటి వాయువులను నిరంతరం గమనించడం ద్వారా శాస్త్రవేత్తలు విమానాల భద్రత, పర్యావరణ పరిస్థితులపై సరైన అంచనాలు వేయగలుగుతున్నారు. హైలీ గుబ్బి అగ్నిపర్వత విస్ఫోటనం మన గ్రహం ఎంత చురుకుగా మారుతుందో అంతరిక్షం నుంచి చేసే పరిశీలనలు ఎంత ముఖ్యమో మరోసారి మనకు గుర్తుచేసింది.

ALSO READ: ఇండియావైపు దూసుకొచ్చిన భారీ బూడిద.. ఆ అగ్నిపర్వతం పేలుడుతో ముప్పు పొంచి ఉందా?