Lakshmi Aruna 
“Gen Z కి clarity లేదు”
ఈ వాక్యం ఈరోజు చాలా సులభంగా మనం అంటేస్తున్న మాట. కానీ నిజంగా ఆలోచిస్తే… వాళ్లకు క్లారిటీ లేదో, లేక వాళ్లు బ్రతుకుతున్న కాలమే క్లారిటీ లేకుండా మారిపోయిందో మనమెప్పుడైనా ప్రశ్నించామా? ఆలోచించామా? ఒకప్పుడు జీవితం అనేది చాలా సూటిగా ఉండేది. చదువు అయిపోయింది అంటే ఉద్యోగం.
ఉద్యోగం అంటే పెళ్లి. పెళ్లి అంటే కుటుంబం. ఆ దారిలో పెద్దగా ఆలోచనలకు, సందేహాలకు చోటు ఉండేది కాదు. ఎవరు ఏం చేయాలో ముందే నిర్ణయించబడినట్టు ఉండేది. కానీ Gen Z ముందు జీవితం అలా లేదు. ఒకే దారి కాదు… వందల దారులు కనిపిస్తున్నాయి. ప్రతి దారి “ఇదే సరైనది” అన్నట్టు పిలుస్తోంది.
కానీ ఏ దారిలో అడుగు పెట్టాలో చెప్పే స్పష్టత మాత్రం ఎక్కడా లేదు. ఈ అయోమయం ఒక్క వ్యక్తిదే కాదు. ఇది ఒక తరం మొత్తం అనుభవిస్తున్న భావన. ఒక యువకుడు ఉదయం లేచి ఆఫీస్కి వెళ్తాడు. ఉద్యోగం ఉంది, జీతం వస్తోంది. బయటకు చూస్తే జీవితం సెటిల్ అయినట్టే కనిపిస్తుంది. కానీ లోపల మాత్రం ఒకే ప్రశ్న తిరుగుతూనే ఉంటుంది. “నేను నిజంగా ఇదే చేయాలా?” సోషల్ మీడియాలోకి వెళ్లగానే పరిస్థితి ఇంకా క్లిష్టంగా మారుతుంది. తన వయసు వాళ్లలో ఎవరో స్టార్టప్ పెట్టి ఫేమస్ అయిపోతున్నారు. ఎవరో దేశం దేశం తిరుగుతూ జీవితాన్ని ఆస్వాదిస్తున్నట్టు పోస్టులు పెట్టేస్తున్నారు. అప్పుడు తన జీవితం వెనుకబడిపోయిందేమో అన్న భావన మొదలవుతుంది.
అది క్లారిటీ లేకపోవడం కాదు… అది పోలికల వల్ల వచ్చే గందరగోళం. Gen Z సమస్య సమాచారం లేకపోవడం కాదు. వాళ్లకు సమాచారం చాలా ఎక్కువ. ఏ కోర్సు బెస్ట్,ఏ స్కిల్ ట్రెండ్లో ఉంది, ఏ దేశంలో అవకాశాలు ఉన్నాయి.. అన్నీ ఒక క్లిక్ దూరంలో ఉన్నాయి.
కానీ అదే సమాచారం వాళ్లను నిలిపేస్తోంది. ఒక నిర్ణయం తీసుకుంటే ఇంకో మంచి అవకాశం మిస్ అవుతుందేమో అన్న భయం. ఒక దారి ఎంచుకుంటే మిగతా దారులన్నీ మూసుకుపోతాయేమో అన్న అనుమానం. ఈ భయమే క్లారిటీ ని మసకబారుస్తోంది. ఒక వైపు ప్రపంచం “నీ ప్యాషన్ ఫాలో అవ్వు” అంటోంది. మరో వైపు జీవితం “నీ అవసరాలు ఎవరు చూసుకుంటారు?” అని అడుగుతోంది. హృదయం ఒక వైపు లాగుతుంటే, బాధ్యతలు మరో వైపు లాగుతున్నాయి.
ఈ మధ్యలో నిలబడ్డ Gen Z కి ఏది సరైనది, ఏది తప్పు అన్నది తేలడం లేదు. అందుకే వాళ్లు ఆలస్యం చేస్తున్నారు. ఆగిపోతున్నారు. మళ్లీ మొదలుపెడుతున్నారు. బయటివాళ్లకి ఇది కన్ఫ్యూజన్ లాగా కనిపిస్తుంది. కానీ లోపల మాత్రం ఇది ఒక తీవ్రమైన అంతర్గత పోరాటం.
ఇక్కడ మనం ఒక విషయం గుర్తించాలి. క్లారిటీ అనేది ముందే ఉండే వస్తువు కాదు.
జీవితం మొదలైన రోజే ఎవరికీ అన్నీ స్పష్టంగా ఉండవు. మనకు కనిపించే విజయకథలన్నీ చివరి ఫ్రేమ్ మాత్రమే. ఆ ఫ్రేమ్కి ముందు ఉన్న భయం, అయోమయం,
తప్పు నిర్ణయాలు…ఎవ్వరూ చూపించరు. Gen Z ఆ మధ్య దశలో ఉంది. వాళ్ల కథ ఇంకా పూర్తవలేదు. అందుకే అది అస్పష్టంగా కనిపిస్తోంది. పాత తరాలు జీవితం ఎలా ఉండాలో అంగీకరించాయి. ఈ తరం మాత్రం “ఈ జీవితం అర్థవంతంగా ఉందా?” అని ప్రశ్నిస్తోంది. అదే అసలు తేడా. ప్రశ్నించడం వల్లే వాళ్లు క్లారిటీ లేనట్టుగా అనిపిస్తున్నారు. కానీ నిజానికి వాళ్లు అంధంగా నడవడం లేదు. వాళ్లు ఆలోచిస్తున్నారు. తమకు అర్థం కాని జీవితాన్ని ఒప్పుకోవడం వాళ్లకు ఇష్టం లేదు. ఖాళీగా ఉండటం వాళ్ల భయం కాదు. అర్థం లేని జీవితం వాళ్ల భయం.
బహుశా సమస్య క్లారిటీ లేకపోవడం కాదు. తొందరగా క్లారిటీ కావాలి అనుకోవడమే సమస్య. కొన్ని సమాధానాలు కాలంతోనే వస్తాయి. కొన్ని దారులు నడిచిన తర్వాతే స్పష్టమవుతాయి. ఈ అయోమయం,
ఈ గందరగోళం, ఈ ఆలోచనలే ఒక రోజు వాళ్ల వ్యక్తిత్వాన్ని నిర్మిస్తాయి. అందుకే Gen Z ని స్పష్టత లేని తరం అనడం కంటే స్పష్టతను నిర్మించుకుంటున్న తరం అనడం నిజానికి దగ్గరగా ఉంటుంది.
మీరు కూడా ఈ మాటలు వింటూ మీ గురించి ఇలానే అనుకుంటే, ఒకటి గుర్తుంచుకోండి. మీరు వెనుకబడ్డారు అని కాదు… కేవలం మీరు మీ దారి వెతుకోవడంలోనే అయోమయంలో ఉన్నారు. అది తప్పు కాదు. అది ఒక దశ. క్లారిటీ రావాల్సిన గమ్యం కాదు. అది ప్రయాణంలో పుడుతుంది.
